香港警方對於香港水域內大飛曬冷，束手無策，走私幫派目無王法，數十艘走私船公然示眾，剃保安局局長眼眉，...

香港警方對於香港水域內大飛曬冷，束手無策，走私幫派目無王法，數十艘走私船公然示眾，剃保安局局長眼眉，剃警務處處長眼眉。香港警察做唔到嘢，最後又係要麻煩廣東公安出動去幫香港警方執蘇州屎！

網上流出廣東特警打擊大飛嘅影片，拍攝地點大概係珠江沿岸東涌橋一帶，片中可見有多架公安直升機高空狙擊大飛，大飛幫爭相逃命，最後仲有一幅直頭好似電影《國產凌凌漆》裡面，班罪犯喺漆黑中被大燈照住踎地嘅場景！

片中睇到廣東公安對住對講機喊話「加速加速」，威風澟然，廣州增城個公安領導球爺剩係坐喺中間都 feel 到好有架勢。

嗱，香港警察真係要學嘢，廣州公安咁先至叫做辦案。香港警察個人工唔係平，仲有 OT，但做嘢又及唔上人哋廣州公安，唔通到咗今時今日，香港警察仲以為好似以前咁有鐵飯碗唔休做呀？

---